"PANORAMA GIOVANI": Ve ricordè de quel suplemento che per tanti xe sta "palestra de dibattito" e scola de giornalismo?

Son quasi sicuro che tanti de voi che legè ogni sabato sta rubrica in tel nostro dialeto ve ricordè del quel inserto de quatro pagine colorade (gialognolo, verdolin, celestin, rosa) dela rivista “Panorama” de l’Edit de Fiume.

Quel inserto el se ciamava “Panorama Giovani” e col tempo el iera diventà una “palestra de alenamento del pensiero”, una libera vetrina in do’ che i giovani Taliani de l’Istria e de Fiume i podeva meter in mostra la creatività che i gaveva, cossa e come che i scriveva, in che modo che i ragionava. Non per niente, tanti dei colaboratori de “Panorama Giovani”, una volta cressudi, i xe diventati diringenti della CNI, giornalisti, professori universitari, poeti e scritori.

“Panorama Giovani” iera un inserto inventado al principio dei anni Settanta, co’ diretor de “Panorama” iera Lucifero Martini,  che ‘l xe andà avanti fin ala metà dei anni Novanta del secolo scorso. Poi le publicazioni le ga tacà de novo verso el 2005, ma quela iera xa una seconda fase, sai più “disimpegnada” e spensierada.

In tela prima fase, “Panorama giovani” iera un suplemento che el vegniva gestido diretamente (quela volta se diʃeva “autogestito”) dai giovani, con un responsabile a Fiume. No so chi che xe sta i primi responsabili, ma me ricordo ben, per gaver lavorà con lori, che in tela fase culturalmente più intensa del suplemento i capi iera Ezio Giuricin e Aldo Bencina, con Ezio Mestrovich caporedattor de Panorama.

Questa prima fase in cui “Panorama Giovani” iera un logo de dibatito e de confronto de idee, la ga portada avanti ancora un poco altri due responsabili nela redassion de Fiume: Sanda Rundić e Lucio Vidotto.

Per capir „Panorama Giovani“ bisogna dir per prima roba che i giovani dei anni Settanta e Ottanta i iera diferenti dei sui genitori e noni, roba, del resto normale. Ma quel che iera diferente rispeto a tuti i altri giovani che no i fasseva parte della minoransa italiana, iera el fato che, come che go xa dito, a diferensa dei genitori e dei noni no i iera mai vissudi soto l'Italia, no i gaveva i ricordi del periodo in cui i Taliani iera la magioranda,  i parlava ('bastansa) ben croato e sloven, i scoltava musica jugoslava, i legeva libri e fumeti jugoslavi e, sensa rinuciar al proprio esser Taliani, i iera verti al dialogo e ala convivensa. Bisogna anche dir che, pur vivendo in tela Jugoslavia socialista, i iera sai meno inamorai (o assogetai, o insempiai) dala ideologia comunista rispeto ale generassioni che li gaveva precedudi. In altre parole, no i iera né nazionalisti, né comunisti de regime.

In tela seconda metà dei anni Ottanta, co 'l mondo el stava per cambiar (el cambierà nel 1989 co vien xo el muro de Berlino e riva la fine dei regimi comunisti in tela Europa de l'est), el discorso de recupero e del novo posizionamento dell'italianità che proponeva i giovani Taliani de l'Istria e de Fiume indicava che 'sti giovani i se gaveva messo in serca dela democrassia, proponendo el multiculuralismo e 'l multilinguismo come una richessa culturale de tuto el teritorio.

Sti principi, a veder ben, i vegnerà poi trasformadi in azion politica prima dal „Gruppo 88“ (che ga avù el merito de gaver trasformado la comunista Unione degli Italiani de l'Istria e de Fiume in tela Unione Italiana democratica, ma anche quel de gaver sburtà la riabilitassion politica del professor Borme), poi dalla Dieta Democratica Istriana dele origini (no quela de ogi) che la gaveva fato da argine al nazionalismo croato dei primi anni Novanta.

In un regime in cui esisteva la censura, ma anche l’autocensura, la leteratura xe stada sempre quel strumento in cui certe robe se podeva dirle fassendo finta de no dirle, ma anche el logo indo’ che, in un sistema che proponeva un “io collettivo”, se podeva parlar de l’”io individuale”, dei problemi esistenziali, delle paure, delle speranze, dei sogni che se gaveva come persone singole, no solo come “piccoli pionieri” un fià cressui.

Per questo motivo, tanti dei contributi dei giovani iera poesie e prose curte che, a legerle ogi, le xe sia testiomianza de un periodo storico, sia prova del fato che le domande sensa risposta de quel che se podessi definir come “la condizione umana” le resta sempre le stesse.

Sul versante del ragionamento politico e cultural, el vero ispirator iera Ezio Giuricin: xe sta lui a propor, come nuclei centrali dei ragionamenti, due obiettivi: el recupero del senso de appartenza alla Comunità italiana de l’Istria e de Fiume e la socializzazion de la lingua italiana in tel nostro teritorio. Dopo quaranta ani, se pol concluder che, grazie al bilinguismo, la seconda finalità la ga avudo una sorte un fià meo dela prima. Infati, dopo che, con la democrassia, nel 1991 el numero de Taliani xe tornà a cresser (in tanti, soto el comunismo, i gaveva paura de dichiarar coss’ che i iera), ma el censimento del 2021 ne mostra invesse che ‘sto “senso di appartenenza nazionale” el se ga sai indebolì.

Concludemo ricordando i nomi dei quei che i ga contribuì a far de “Panorama Giovani” un’ esperienza de cultura, ma anche de identità, da ricordar. Aldo Bencina xe sta uno dei giornalisti più brillanti de Panorama, Ezio Giuricin, colaborator del Centro de Ricerche storiche de Rovigno, coautor dei documenti principali dela nova UI, con Maurizio Treml e Elvio Baccarini membro de quela redazion de “La Battana” che la ga avudo el grande merito de publicar el romanzo Martin Muma de Ligio Zanini, xe uno dei più bravi e preparai giornalisti de TV Capodistria.

Nei primi anni Settanta in “Panorama Giovani” le sue prime poesie le ga publicà le poetesse de Dignan Loredana Bogliun e Adelia Biasiol, poi, sempre in poesia, nei anni Ottanta la Capodistriana Ellen Delaš e la Fiumana Laura Marchig (poetessa e scrittrice, diventada prima giornalista de “La voce del popolo”, poi caporedattrice de “La Battana”, poi direttrice del Dramma Italiano de Fiume), i Polesani Ugo Vesselizza (uno dei più apprezzi dalla critica) e Fulvio Meguschar (poi diventà professor de italian in Estonia), ma anche Maurizio Tremul de Bertocchi, dirigente de punta de l’Unione Italiana. Tremul publicava anche i sui ragionamenti sula politica e la cultura, temi che xe stai tratadi in “Panorama Giovani anche da Franco Juri  (uno dei massimi esponenti del “Gruppo 88", poi ambasciator sloven in Spagna), dal compianto Roberto Battelli (a lungo deputato della minoransa italiana al parlamento de Lubiana), dai giornalisti capodistriani Sergio Settomini e (nato a Dignan) Claudio Geissa.

El grupo de Fiumani el iera forte: Elvio Baccarini, filosofo, professor (e prima anche preside) del Dipartimento de Filosofia dell’Università di Fiume,  Diana Pirjavec, giornalista all’Edit come Ilaria Rocchi che oggi xe la caporedattrice de “Panorama” e Denis Stefan, poi professor al Liceo talian de Fiume.

Tra i Rovignesi me ricordo de Silvano Zilli (el xe sta presidente della Giunta esecutiva dell’UI e vicesindaco de Rovigno), da Buie sccriveva Lionella Pausin (poi diventada giornalista de Radio Capodistria), da Umago Denis Visintin, poi professor e colaborator del Museo de Pisin.

De sicuro me go dimenticà de tanti nomi, ma xe dificile recuperarli perché su “Panorama Giovani”, per quel che so mi, non xe mai stai scrito un testo come che se devi. Eco ‘lora una bona idea per una tesi de laurea.