Sta setimana finalmente i ga comincià refar la strada da Montegrande a Fasana, una dele “strade dela morte” dela zona de Pola, ma subito xe vegnù a gala un grosso problema: i sta taiando un mucio de alberi che i stava là, pareria, da l’Otocento. Capisso sai poco de piante, me par che sia per la magior parte cedri, pini e qualche cipresso.
Subito xe nati due partiti, quel del “pro” e quel del “contro” el taio de sti alberi: quei che i xe a favor i dixi che iera ora de taiar sti alberi perché tanti automobilisti i xe andai a sbater, anche perdendo la vita, sui alberi che i xe tacai a l’asfalto. Per lori, e su questo no se pol darghe torto, la vita de una dona o de un omo la val de più de quela de un albero. Ma questo non vol dir che la vita de un albero no la val gnente.
Quei che i xe contrari i sostien che i alberi i và salvadi a tuti i costi, che a Pola ghe ne gavemo taiadi xa tropi (ma in tel conto no i meti mai quei che i xe stai impantai, e i xe stai tanti in tei ultimi anni) e che se certa gente xe morta in strada no saria colpa dei alberi ma de sti stessi saferi perché i gavevà bevù.
Poi xe un terso grupo, quel dei consiglieri del municipio de pola che’ desso i protesta ma che co’ xe sta presentà el progeto no i gaveva dito niente. Probabilmente tanti de lori no i lo ga gnanche leto, e quei che i lo ga leto i ga avù un anno de tempo per presentar controproposte, ma i xe stai siti fin che le motoseghe no le se ga messo in moto.
Mi no so come che la pensè voi, ma mi ve digo la mia. Per prima roba xe de dir che no tuti quei che i ga perso la vita in quela strada i iera imbriaghi al volante. A volte xe nebia, a volte piovi, a volte xe le gome vecie, a volte cedi i freni e là i alberi i sta subito rente l’asfalto, xe facile andar sbaterghe sora.
Seconda roba. Mi ai alberi ghe voio ben, i me piasi, ma so anche che se in tela storia de l’omo no se gavessi mai tirà xo un albero, ogi no gaveriimo gnanche una riga de asfalto, né città, ne piasse, ne scuole, né stadi, né teatri, né parchi. Niente de quel che fa bela la vita.
Dito questo tornemo ala strada per Fasana. Quei alberi, che in certi punti i formava un bel vial ombroso, no i xe spontanei, i li ga impiantadi i giardinieri de Franz Joseph proprio per farghe ombra ale carozze trainade dai cavai che le passava de là. Sta roba capitava più de 100 anni fa, co no iera auti, motorini, no iera el BI- Village, Fasana gaveva la metà dei abitanti, a Barbariga no stava no solo i Sloveni, pa proprio nissun e no iera turismo. E anche se el caval el finiva fora strada, no se moriva del colpo su l’albero.
Al giorno d’ogi, invesse, xe impensabile che la strada la resti cussì stretta, coi rami dei alberi che quasi i riva dentro ai finestrini dei auti. Quela strada l'andava slargada a tuti costi, e per slargarla bisognava spostar i alberi. Go scrito spostar, no masacrar. Eh sì, ormai xe tanti anni che le società più svilupade, primi dei tuti i Giaponesi, i alberi no i taia ma i li sposta, e sta roba se podeva far anche con quei dela strada per Fasana. No se trata miga del quel che i Americani i ciama "rocket science".
E qua vegnimo al problema vero. Mi no me intendo de spostamenti de alberi, ma guardando su internet se vedi che spostar un albero adulto, pini compresi, costa dai 2 mila fino ai 10 mila euro. E se el Municipio, titolar de l’investimento, el gavessi speso 100 o più mila euro per salvar i alberi, i primi che i ghe gavessi dado contro saria quei che ‘desso i xe contrari al taio.
Se parla de quel tipo de gente, e su internet ghe ne xe quanti che volè, che i xe sempre contrari de tuto, che tute le spese publiche saria esagerade e tuti i progeti megalomanie. Xe quei che i ghe dixi al sindaco che el spendi soldi publici, dimenticandose che el mestier del sindaco no xe quel de guadagnar soldi, ma de spenderli, e spenderli ben per tuta la coletività. Se lui li gavessi spesi per salvar i alberi dela strada de Fasana, mi ghe gavessi dito “bravo”!
In tei ultimi otanta anni a Pola semo stai boni apena de far qualche scuola, una piscina cussì cussì, un stadio cocolo ma picio e uno più grande ma bruto. E gavemo sistemà le robe sototera dopo che ala fine dei Anni Novanta iera s’ciopado el gas.
Come che la vedo mi, i sindaci e le aministrazioni municipali le dovessi sempre lassar drio de sé un segno, una bela opera publica, un monumento, qualcossa de distinguibile per la cità che i ga governà. Invesse niente, meno mali che sti comentatori de facebook tuti risparmiosi no i iera qua domila anni fa: se i fussi stai desso no gavessimo gnanche l'Arena.
