Qualche giorno fa me xe vignudo in mente dei gioghi che fasevo co iero picia. Me go sentà su la poltrona e go cominciado a pensar de tuti quei che me ricordo.
El primo che me xe vignudo in testa xe el giogo de l'angelin e dei colori. No so se ve ricordè, el andava cusì: uno faseva l’angelin che el ghe domandava a una specie de custode un color e i altri pici, ognidun, iera un color. L’angelin vigniva la del custode e lui ghe domandava:
Custode: "Chi xe qua?"
Angelin: "L’angelin."
Custode: "Cosa el vol?"
Angelin: "Un color."
Custode: "Che color?"
Alora l’angelin diseva un color e se uno dei pici iera sto color el se meteva a corer e l’angelin doveva ciaparlo. Se nisun dei pici iera el color che diseva l’angelin alora el custode ghe rispondeva: "Caga in mastela." Interesante.
El giogo che me xe subito dopo vignudo in mente iera l’astico. L’astico si, quel che le nostre mame e none usava per le mutande. Quanti salti che go fato col giogo de l’astico! Se trovavimo in piasa e per ore e ore tuti contenti con un toco de astico fasevimo de tuti i tipi de gioghi. "Ciarli, Ciarli, Ciarli, Ciarli, Ciarli" o "Prsti, peta, lastik, cigareta" iera solo due dei tanti che fasevimo.
In fine, e qua me go fermado perchè me son squasi mesa a pianser per la nostalgia, me xe vignudo in testa el giogo che se faseva con la bala e el muro: "O, E" lo ciamavimo. In pratica, fin che se butava la bala sul muro ti recitavi una filastroca e ti dovevi far le robe che diseva sta filastroca sensa che la bala te caschi per tera.
O, E
Stando fermo
Senza ridere
Con un piede
Con una mano
Bato
Gigo, giago
Un mulino
Un bacino
Toco tera
Chiesa
Girandola
Forsi qualche pasagio me lo sarò anche dimenticado, xe pasado tanto tempo.
Ghe volesi far una racolta scrita de tuti i gioghi de una volta per non dimenticarli e per tramandargheli ale nove generasioni. Anche se no son tanto convinta che i fioi de ogi se divertiria quanto che se divertivimo noi.
Cedo la parola a Velan...
Ti ghe domandi al vecio pescador del tempo che farà domani e lui te rispondi: "Fra un vento e l'altro podaria far bonasa". No el sgara, bisogna gaver pasiensa, se ti domandi tropo ti diventi nervoso e no ti te concentri su quel che sta sucedendo. Ligio Zanini ga lasà scrito che l'Istria xe una penisola ventilada, sufia sempre e cambia sempre, ti vadi in mar con un vento e ti torni con un altro. El mar xe fermo come l'oio? In pochi minuti vien zo la bora, forte, freda e la te incasina la vita in barca, magari co ti atraversi el Quarnero. Sto toco de mar, da Punta Promontore a Unie, el xe pien de storie: più storie che mar.
Se disi a Rovigno: "Oun caleigo fa ouna bora, tre caleighi fa ouna piova", xe ciaro? Caligo xe la nebia, la magla. No servi la television, o Dio, la television iuta ma no tanto... Xe vero però che la meteorologia la xe diventada una notisia, la gente speta che pasi la politica e tuti se concentra su le previsioni. Xe gente che compra el giornal per le previsioni del tempo e per saver chi che xe morto ieri. Co iera bel tempo mio pare el diseva: "Chi che xe morto ieri ogi ghe dispiasi".
La meteorologia dei veci la te insegna sempre qualcosa, ti te rendi conto che no xe importante el tempo ma la logica dei cambiamenti de tempo. I disi sempre a Rovigno: "Garbinaso, quil ch'i truvo laso". Dopo ogni sventolada de sud-ovest torna el tempo de prima: ti pol andar anche a fondo ma pochi minuti dopo se prosegui e nisun no se fa mal, "rangeve!".
Una ultima ociada a la tradision dei pescadori rovignesi: "Maistralon douro siruoco al coulo", da nord-ovest se pasa al vento de sud-est, ti devi star atento, no xe mai tropo tardi per imparar. Xe qualchedun che no el impara mai. No tuto quel che nasi e cresi soto el campanil el ga la tutela del ben, qualche volta i santi i sgara e sucedi casini.
La cieseta de la Madonna de le Grasie la custodisi i ex voto dei pescadori e dei marinai che i se ga salvà del maltempo in mar. Xe quadri molto semplici, sensa grande ambision artistica ma, i te mostra batei e velieri coverti da le onde, grandi, bianche; nuvoloni neri come el fuscun, ciarori de lampi e sul canton l’imagine de la Vergine Maria. Xe quadri che te fa rifleter: anche l’omo el xe come el vento... co el xe tropo forte el masina tuto quel che el trova...
