UN AUGURIO PER EL 2024: Sta nostra Istria la xe cusì bela, vedemo de no rovinarla

Semo rivai ala fine de un altro ano e, come che se usa in ste ocasioni, ghe volesi tirar le some. E 'lora provemo a farlo. Per cosa se ricordermo in Istria de 'sto 2023, oltre che per i turisti che i ghe ne vien ogni ano de più?

De sicuro xe sta l’ano in cui le autorità ga comincià presentarghe el conto a tuti quei, nostrani e foresti, che tirava su vichendice, casete e vile con piscina senza gaver el permeso. Qualche bagher se ga xa visto al’opera (anche se con sto ritmo ghe volesi docento ani per tirar xo tuti i matoni abusivi), qualche d’un ga comincià a smontar solo quel che no ‘l doveva mai montar e in più la region de concerto con le cità e i comuni istriani la ga verto anche un sito internet de denuncia conto l’abusivisimo edilisio bespravnagradnja.hr.

Xe sta un ano in cui questo giornal letronico el ga denuncià anche bastansa de quele trapolade che tanti combina, sensa permeso, rente el mar (in quela zona che la se ciama demanio maritimo: a Caltanisetta – pomorsko dobro), ma el ga scoperto anche una serie esagerada de scovasoni fora lege in tute le parti de l’Istria.

L’altra sera, un mio amico, che el ga fotografà l’Istria dal ‘roplan venti ani fa ma anche do ani fa, el me contava come che la nostra penisola la xe cambiada in meo in sti ultimi ani: i copi dei teti xe riparai, le vigne e i uliveti sistemai, i campi aradi; bon, dai, xe qualche pisina de tropo. Davanti a sta belesa, regalada specialmente dala natura, xe pecà rovinar, cementar, inquinar, carigar sta tera de scovase. Femoghe un pensierin, un pensierin con la testa nostra, anche se sto ano xe sta l'ano dela inteligensa finta, occhei, intelligenza artificiale.

Fortunatamente xe sta un'estate sensa fogo, anche se in agosto no ga mancà fulmini, saete e una libeciada che la ga sradigà alberi e fato dani, specie a Parenso, Citanova e Umago.

Dopo l'era de Stevenson, in Istria xe rivà un treno novo, ma el ga durà sai poco:o le sine istriane no le va ben per lui, o lui no 'l va ben per lore. Saria de rider, anche se xe de pianʃer.

A Pola l’aministrasion de piasa Foro la ga becà qualche bel scorlon: ridisegnade le aziende municipalʃade, scasà via un asesor, un’altra (brava) la xe andada via sola, el sindaco el ga combinà qualche capela vietandoghe a uno dei quei cantanti de “narodgnazi” de cantar liberamente al palaseto delo sport, poi el ga becà una cantonada presentando, sensa gaverlo studià ben, un documento che pareva scrito dala boncostume de cento ani fa, con el qual in spiagia se vieta el toples (che saria le tete dele babe al vento) e de bever alcolici.

I lo ga proclamà reasionario conservator, mi a volte el me fa pecà, speso i lo pitura peʃo del quel che ‘l xe. Perché bisogna eser onesti e ameter che con questo sindaco le tabele dele coriere dela Pulapromet le xe diventade bilingui, e questo xe un bel paso in avanti per mostar nela vita quotidiana, a chi che sta a Pola e a chi che vien de fora,  l’identità storica dela cità.

Per quel che riguarda invese la sopravivensa dela identità dei Taliani de l’Istria, i Circoli i xe ancora vivi, tanti i fa bele atività e i due festival dei nostri dialeti, quel de l’istroveneto e quel de l’istrioto, i ga ancora bon vento in tele vele. E a Parenso, la "Mula de Parenso" la xe diventada un prodoto turistico. Primo o poi capita de tuto.

Anche se con qualche problema de percorso, sto altro ano dovesi eser fata la nova scola elementare taliana de Citanova, a Pola, dopo una litania de “no se pol” che la durava trenta ani, finalmente se meterà a posto el bagno de Stoia (opera architetonica de valor del razionalismo talian) e a Rovigno i sistemerà la piasa principale, quela dela Tore de l’orologio, che la se ciama Maresciallo Tito. I Polesani gaverà anche el primo incontro con i parchegi rotanti, xe un per de tori che par de star in un carton animato de Goldrake.

Sto altro ano xe le elesioni, ghe vol pur farghe le bele a chi che vota, cusì, a  sentir el primo ministro Plenković, prima de l'estate i doversi verzer anche la seconda cana del tunel soto el Monte Magior, cusì che sarà ancora più facile andar dentro e vegnir fora da l'Istria.  Invese, quela che per secoli xe stada la strada maestra de l'Istria costiera, quela per Trieste, la continuerà a strenʃerse come una piria a Castelvenere; i Sloveni prima de far l'autostrada tra el confin croato e quel talian...stago sito che no me sponʃo.

Un'ultima nota sula nostra identità: Istra24 xe l’unico giornal croato de l’Istria che publicà, quasi ogni giorno, anche articoli in italian e in tel nostro dialeto e questo no xe un detaglio da trascurar. Tuta la redasion de Istra24, croati, taliani, macedoni, misiai (anche i cani) ve augura de gaver un bon ano novo. Godeve la note de san Silvestro, sciampagna per tuti e che Dio ne la mandi bona.