UN GOSSIP DE 400 ANI FA: Quel francese cotoler che 'l ga tirà su el Castel de Pola, la "città cadavero" nel "golfo più bel d'Europa"

“Se no xe qualche d’un che le conti, le storie no le esisti”, ga dito el grande ator talian Marco Paolini, cussì oggi ve contemo la storia de un gossip de 400 ani fa.

Se Pola, in un certo momento de la sua storia, la xe diventada una grande cità cosmopolita, el merito ghe va ai Austriaci che nel XIX secolo i la trasformada in porto de guera. Ma ꭍa docento ani prima anche i Venesiani, che a quel tempo i comandava in tel’ Istria costiera, i se gaveva acorto che el golfo de Pola el iera speciale.

Se da una parte i proveditori venesiani per secoli i gaveva trascurà Pola del tuto (forsi no i gaveva voia de basilar con la malaria), limitandose a descriverla come “città cadavero”, de l’altra no i iera miga insenpiai e i vedeva anche lori che el logo el iera perfeto per le barche. Nel 1583 el proveditor de Pola Marino Malipiero el ga mandà una relasion a Venesia in do che ’l ga scrito che Pola xe mesa in un logo splendido e che el suo golfo el iera adato per scopi militari. E xe proprio dale stime venesiane sul golfo de Pola che nasi la storia che ve contemo ogi.

Nel 1619 riva a Pola un certo Pietro Matteacci, esperto de robe de guera, che per el governo de San Marco el scrivi un raporto intitolà Racordo novissimo dell'lstria. Poi el devi eser tornà de novo perché nel 1625 el ga scrito un documento sai importante per la storia de Pola intitolado Discorso su Pola e con sto nome el xe catalogado nela Biblioteca del Museo civico de Padova.

Ben, studiando propio sti do documenti, Egidio Ivetić, che ogi el xe uno dei storici de l’Istria più stimai, el ga fato la tesi de laurea al’Università de Padova. Egidio de mulo el stava a Carnizza, el ga finì la scuola elementare e quela media italiana a Pola e poi el destin ga volù che lui e mi andasimo studiar insieme. Lui el iera xa mato per Bertoša, Rakovac e Tomizza e la prima volta che semo rivai a Padova per tacar studiar, co semo smontai del treno, la prima roba che el ga dito pena che gavevìmo calà la gamba sul sfalto dela stasion dei treni de Padova, xe sta „riva i druxi“. Ogi Egidio xe profesor al'Università de Padova e sai volte i lo ciama in television, a la Rai o altre TV nazionali taliane, co ghe servi qualche d’un che ghe parli de l’Adriatico o che ghe spieghi el gropo dei Balcani.

Bon, tornemo a Matteacci, che per becar qualche punto nel suo Discorso su Pola el se ga rivolto al patrizio Domenico Molin, che 'l iera un stratega militare. Alora, docento ani prima che i Austriaci metesi in pratica l’idea, sto Matteacci vedeva Pola come un porto militar, spiegando che trasformarla in porto de guera saria sta la salvesa de quela Pola scalcagnada: “sarebbe tanto facile a redimer Pola”, el gaveva scrito, “habitarla, ridurla insieme, et ricever da essa rendite utili regolando con la sua protettione gli disordeni della Provincia d'Istria, quanto che hora cadaverosa, et giacente non serve ad altro che a pravi eccitamenti de animi avidissimi alle pubbliche giatture”.

Anche se de Pola el ga scrito “città cadaverosa, un horrendo spettacolo, non essendo in essa più di quaranta habitanti”, lo steso per sto Matteacci el golfo del Pola el iera el più bel in Europa: “ogni vassello, d'ogni parte del mondo, volendo venir a Venetia, deve passare appresso, et dinanzi alla bocca del porto di Pala, necessità sopramodo considerabile. Esso porto è capace d'ogni grossa armata, et potrebbe ricever tutte l'armate delli potentati dell'universo, sicuri da tutti li venti.”

Questa relasion la xe nata anche come conseguenza de la Guera dei Uscochi (o Guera de Gradisca) tra Venesia e i Asburgo, una guera che dal 1615 la xe andà avanti fino al 1618 e che in Istria, divisa a metà tra Venesiani e Austriaci, la gaveva portà tanta distrusion e morte. Ocoreva fortificarse. Cusì, dopo le proposte de Matteacci, el 15 setembre del 162, el Senato de Venesia el ga deciso de tirar su un forte sul castel, al posto del quel vecio e rovinà dei tempi dei Castropola, ma anche un altro più grande su l’isola de Sant’ Andrea. Anche se i lavori su sto picio scoio del golfo i iera cominciai, presto i xe stai abandonai e, dopo una pausa per via de la peste, nel 1631 xe sta ciamà l’architeto francese Antoine De Ville.

Sto omo in do ani el che fato tirar su el castel come che lo vedemo anche ogi (ma mai finì nel modo che 'l iera sta disegnà nel progeto), solo che per farlo el ga smontà del tuto el vecio grande teatro roman. No quel “picio” soto el castel e che anche ogi el xe ancora là, ma quel altro che 'l stava sora la vecia discoteca “Uljanik”, sul versante nord de Monte Zaro che proprio da sto teatro, per via de la trasformasion fonetica theatron – zadron – zaro  el ga becà el nome. Sta roba la spiega ben anche el profesor Viktor Božac nel suo sagio „Imena brežujlaka grada Pule“ ("I nomi dei colli della città di Pola“).

Per el fato de gaver fato sparir el vecio teatro roman, che el iera lungo 85 e largo 120 metri con una capiensa de 5 mila spetatori, De Ville xe sta maledì dai archeologi che i xe vegnudi dopo de lui, e uno de questi iera quel Francesco Carrara che ogi el ghe da el nome ala via che la pasa davanti a porta Gemina e che da est la porta propio al Castel. Da parte sua, l'ingegner francese la gaveva butada in filosofia e nel suo libro Descriptio portus et urbis Polæ antiquitatum, ut et Thynnorum piscationis descriptio curiosa (Descrision del antico porto e dela cità de Pola e una curiosa descrision dela pesca del tono) el ga scrito più o meno cusì: “Ghe gavemo dà al teatro un’altra forma e lo gavemo spostado più in alto sul monte. Tuto cambia, soto sto ciel nisuna forma la pol durar per sempre, solo la materia la resisti per sempre”

Per onestà bisogna dir anche che l’Arena De Ville no la ga volù tocar e smontar. “Perché distruger un’opera del genere”, el gaveva scrito, “costruida con tanta fatica. Lasemola star, per l’orgoglio dei abitanti, per la meraviglia dei visitatori e come memoria de l’antichità che la se rinovi per durar in eterno”.

A quei che ghe interesa la storia de Pola sto fato de chi e quando che i ga fato el Castel i lo sa ꭍa, ma xe altri detagli meno conosudi.  Me li ga contai Miodrag Kalčić, tuti i lo ciama Kina, el xe un bravo fisico che ghe piasi sai scavar nel tempi pasadi de Pola. El me ga dito che sto Francese, che al'epoca el gaveva 30 ani, oltre che pescar toni nel golfo de Pola, e pur esendo sposado, el iera un cotoler.

Disegno del porto de Pola nel 1782 de Louis-François Cassas: se vedi el castel ma anche, in baso a sinistra, la tore per la pesca del tono

Cusì, andando in giro, a Mormoran (che in croato se disi Mutvoran) el ga conossù una baba, una certa Fumia, el ga tacà a farghe le bele e sicome tante volte „da cosa nasce cosa“, da sta fornificatione xe nata una creatura. Lorenzo, nato in adulterio, fio del cavalier Antonio De Ville e de donna Fumia de Mormoran, el xe sta batesà el 5 novembre del 1632 dal prete Alberto del Becho, ma una setimana dopo el nome de sto picio el iera ꭍa notà nel libro dei morti.  Ma sto lughero de ignegner no'l ga visto suo fio né nasser, né morir, perché el iera sa tornà (o scampà?) in Francia lasando sola la povera Fumia. Insoma, sto omo el gavesì dovù tirar su un castel ma no 'l ga finì el lavor, ma el ga finì un altro lavor che no'l gavessi dovù gnanche cominciar.

El Castel de Pola no 'l xe sta mai usado per quel che el gavesi dovù servir e mai el xe sta impiegà in guera in azioni de difesa. In altre parole, el xe restà inutile fino al 1955 co el xe diventà la sede del Museo de la rivolusion popolare, ogi Museo de storia e dela marineria de l'Istria. Speremo che el resti un museo per sempre, e che i sui canoni i staghi muti per l'eternità.