Xe sta un periodo che andavino a Trieste in nave. E i Triestini i vegniva in Istria per mar. No, no se trata del periodo austriaco, co questo modo de viagiar el iera normale, ma parlemo de meso secolo fa, soto la Jugoslavia, co’noi andavino a Trieste a far la spesa o trovar i parenti esuli e da Trieste i parenti esuli i vegniva trovarne noi e i altri Triestini i vegniva in Istria per turismo o per farse una bona magnada.
El viagio no’l iera curto, el durava cinque ore, ma quela volta le coriere ghe meteva poco de meno e poi, viagiando in nave, no se gaveva de far con le colone al “blocco” de Rabuiese / Škofije, né con i ris’ci de guidar per una strada, quela che dovevino far prima che i fasessi la “Ipsilon”, piena de curve e bastansa pericolosa.
L'11 gennaio del 1962, in tel cantier Felszegi di Muggia, vien varade ben tre navi: l’ “Edra” e due gemele, la “Dionea” e l’Ambribella” tanto che quel sarà el primo varo gemel in tel cantier de l’unica citadina istriana restada in Italia. Completade nel cantier de San Rocco, l’”Edra” iera quela più grande, la gaveva 64 metri, le altre due invesse le iere più picie, longhe 45,60 metri. Tute tre le iera de un bel color blu.
foto: Nautipedia
El paron dele navi era la Società Navigazione Alto Adriatico di Trieste che la gestiva le linee turistiche in tel Alto Adriatico, apunto: l’”Ambriabella” la iera usada per la linea Trieste - Grado, la Dionea per la Trieste-Grigiano-Sistiana e per la Trieste-Muggia-Capodistria, l’"Edra”, che tanti dei voi se ricorderà de sicuro, sei volte la setimana la fasseva la rotta Trieste, Capodistria, Piran, Umago, Cittanova, Parenzo, Rovigno e Pola, con quela che in tei primi anni no la se fermava a Rovigno, a Cittanova la se fermava solo el mercoledì e la rivava fin a Pola solo el venerdì.
L'Edra a Umago nel 1970
Sta linea marittima tra Trieste e l’Istria servida dala nave “Edra” – in qualche occasion sostituida da l”Ambiabella” – la xe durada dal 1962 al 1978 co’ l’”Edra” la vien venduda al Ministero dei Trasporti per esser utilizada dale Ferrovie dello stato italine in tel stretto de Messina, colegando la Sicilia e la Calabria.
Al suo posto, in tela linea tra Trieste e l’Istria subentra la “Dionea” che nel 1979 la vien comprada da l’armador Lloyd Triestino per pasar, nel 1987 a l’Adriatica di Navigazione de Venezia. I ultimi viagi della “Dionea” verso i porti de l’Istria i xe del 1990, poi, co xe cominciada la guera in Croazia, el viagio “in barca” da Trieste a l’Istria el vien cancelado, pareria per sempre.
De l’”Edra”, la più famosa tra le tre navi che colegava Trieste e l’Istria, gavemo xa scrito. L’”Ambriabella” la xe stada messa in disarmo nel 1975, poi la xe stada venduda a un armador greco-cipriota che la ga ribatesada prima Ios e poi Ios Express. Nel 1996 la compra un’altra compagnia greca che la ghe da el nome del Ionion Express e poi la meti in disarmo in un logo vicin porto del Pireo indo’ che la resta fin al 2009, e do’ che dopo anni de ricerche la vien trovada, comprada e riportada a Trieste per restaurarla, ma i lavori no i xe ancora finidi.
Ambriabella - foto: Paluba.hr
Xe sta più bela la sorte del “Dionea”. Messa in disarsmo nel 1991, nel 1993 la compra un altro armador greco che ‘l ghe da el nome de “Kalara”. Ma nel 1999 la torna in Italia al Cantiere T. Mariotti di Genova per esser ristruturada e trasformada in jot de lusso. I lavori, costadi 17 milioni de euro, i se ga concluso nel 2013 e, grazie al progeto de aredamento interno de Ivana Porfiri, ogi le xe un belissimo esempio de disain talian. Ma anche el scafo, con la mervigliosa prua, xe un picio gioiel.
foto: flyingcharter.it
Oltre ale cabine per el comandante e i 8 membri de l’equipagio, la “Dionea” oggi la pol ospitar 12 ospiti in 6 cabine, 4 matrimoniali e due dopie, tute co i servizi privati. Gestita dala “Società Armatrice Mariotti S.p.A.”, la vien nolegianda per crociere romantiche o familari nel Mediterraneo al prezzo de 80 mila in bassa e 85 mila euro a setimana in tel’alta stagion. La vien nolegiada anche per eventi, come el festival de Cannes, co’ la viene utilizada per organizar cocktails in porto per fin a 120 persone.
foto: flyingcharter.it
Uno dei ospiti dela nova “Dionea” xe stado, più volte, anche Lapo Elkan, el nipote de Gianni Agnelli: “ha un fascino e una classe che nessun scafo moderno può vantare” el ga dito una volta, ametenedo che el stava anche pensando de comprarla.
Eco, una volta la “Dionea” la ne portava indrio de Trieste con le nostre borse nailon, i fustini de Dash, un fià de bacalà in bianco, le “rifle” nove e l’orologio Darwil sul posto. Ogni d'un de noi ga i sui ricordi te un tempo che 'l ne ga lassà qualche bel ricordo, de situazioni che 'desso no le esisti più. Ogi invesse, la Dionea xe una nave esclusiva per i richi. Cussì savemo che el deto “gli ultimi saranno i primi”, se in genere no ‘l val per la gente, el val per qualche nave. Mi no me dispasi.
