"PADOVA PER NOI, CHE STIAMO IN CIMA ALLA BALCANIA"

Chi che tra de voi, letori de questa rubrica, el ga za qualche aneto in gropa, se ricorderà de sicuro dela canson “Genova per noi” de Bruno Lauzi (cantada sai volte anche dal grande Paolo Conte) che la contegniva el verso “Genova per noi, che stiamo in fondo alla campagna”. Ben, quel verso, un per de noi che nela seconda metà dei Anni Otanta del secolo scorso gavemo studià a Padova, lo gavevino trasformado in “Padova per noi, che stiamo in cima alla Balcania”.

Iera ancora el periodo dela Jugoslavia e noi, studenti de Padova, gavevino de far con una situasion bastansa schizofrenica, ierimo visti con mile oci diferenti.

Nel ben, bisogna dir che anche se quela volta no se parlava ancora de dopia citadinansa, per quel che riguardava la casa dello studente o la mensa l’Università ne tratava come se fussimo Taliani. Per lo Stato, invesse, ierimo extracomunitari e bon. Ne tocava andar in questura ogni tre mesi a rinovar el permesso de sogiorno: se te capitava de gaver de far con un polissiotto della Bassa Italia, esser de l’Istria o de Mogadiscio per lui iera la stessa roba. Se invesse el polissiotto el iera veneto, o magari un napoletan che ‘l te diseva “oh, mio padre ha fatto il marinaio a Pola prima della Seconda guerra mondiale”, i te tratava un fia meo.

La stessa roba coi professori: co’ i scopriva che ierimo istriani, a quei de storia no ‘coreva spiegarghe niente, a tanti altri, magari anche de leteratura, co i ne sentiva parlar ti ghe vedevi stampà in fronte un grande punto de domanda.

Divertente anche el nostro raporto con i altri studenti, che no i iera solo Veneti o Taliani, ma anche Palestinesi, Brasiliani, Americani, ma anche de tanti paesi de l’Africa. Per certi ierimo una bela sorpresa, certificada dal comento che i fasseva, el classico (sentido mile volte e in mile ocasioni) “ma come parli bene l’Italiano”, per altri ierimo un misch-masch che no i saveva come catalogar: no iera pochi quei studenti che, co i ne sentiva a noi, che vegnivino dala “cima dela Balcania”, parlar in Polesan, i ne domandava: “che lingua parlate? Veneto-slavo”? Robe de ciodi, insoma.

Quasi quaranta anni fa, no iera come adesso che tanti studenti no solo istriani, ma anche de tuta la Croazia, i va studiar a l’estero, anche in Italia e anche senza gaver fato, come noi, le scuole elementari e medie in Italian. De Polesani ghe ne ierimo, almeno in quei anni, se me ricordo ben, meno de quindici: Enid, Moris e Manuela a Urbino, la Diana e la Gressi a Bologna "la Dotta" (la più vecia Università del mondo), Selina, Alex, Guido, Sergio, Egidio, Ugo, Mauro, Roberto e mi a Padova, dove che iera vegnuda a studiar anche la Claudia de Capodistria. A Trieste iera bastansa Fiumani: la Diana, l’Ilaria, Elvio, e poi Maurizio de Capodistria. Sola e peregrina a Firenze iera la Laura de Fiume.

Scrivo ste robe perché ieri, dopo tanti anni, son tornà a Padova per rinfrescarme la memoria. Go visità le aule al Palazzo Liviano indò che gavevo scoltà le prime lezioni universitarie in vita mia, ma anche quele del palazzo del Bo’, sede de l’Università, indo’ che se trova el famoso Teatro Anatomico dove che, fin al 1872, se tegniva le lezioni de medicina e anatomia con i corpi per le autopsie. Al Bo’, in tela Sala Quaranta, xe anche la catedra de Galilelo Galilei che per dieci anni el gaveva insegnà a l’Università de Padova.

El Teatro anatomico

Xe de dir ancora che in tel Palazzo del Bo’, tra la metà del Cinquencento e quasi la fine del Seicento, nele loge, nella corte antica e in vari atri xe sta colocai i stemi dei rettori, consiglieri, profesori e studenti de quela università. Ben, tra oltre tremila stemi (nel 1688 el governo de Venezia el ga vietà sta pratica perché ghe ne iera tropi) xe anche quei de l’Istria. Infati, Padova xe stada per secoli l’Università de riferimento per i Istriani e i Dalmati che i podeva permeterse de andar studiar. Tra i vari istriani che i ga insegnà a Padova xe de ricordar el Capodistrian Santorio Santorio (1561-1636), el dotor che ‘l ga inventà el termometro e altri strumenti per la medicina (per un certo periodo l’ospedal de Pola el ga portà el suo nome), el xe sta profesor a Padova a partir dal 1611. A l’Università de Padova xe sta profesor anche el grande iluminista Gian Rinaldo Carli  (1720- 1795.), anche lui nato a Capodistria. El insegnava nautica e astronomia.

Questa tradision de profesori istriani a Padova nel XXI secolo la xe stada ingrumada da due Polesani: Egidio Ivetić (1965), che insegna Storia dell’Europa orientale dal 1999, Storia moderna dal 2014 e Storia del Mediterraneo dal 2018 e Mauro Sambi (1968) che a Padova el insegna Chimica Generale e Inorganica. No xe roba da poco insegnar in un’Università fondada nel 1222.

Ieri son andà veder anche Prato della Valle, una dele più grandi piazze in Europa, e poi la famosa cesa de Sant’Antonio che per noi la xe interessante anche perché uno dei diretori del cantier tra la fine del XIII e ‘l principio del XIV secolo xe sta Jacopo da Pola, che quasi de sicuro xe l’autor del progeto del convento e dela cesa de San Francesco de Pola tirada sù nei stessi anni dela Basilica del Santo padovan.

Prato della Valle - foto: Wikipedia

Prima de tornar a casa son ‘ndà veder de novo uno dei più grandi capolavori de l’umanità, i affreschi de Giotto in tela Cappella degli Scrovegni. Dei famosissimi cicli de affreschi, coverti da una volta colorada de un bel celeste, stavolta me ga colpì la scena in cui se vedi el baso tra Anna e Gioacchino, mama e papà de Maria e noni de Gesù. Quel xe el primo baso dela storia de l’arte, tema che poi ne ga lassà altri bei basi come quei de Klimnt, Canova, Munch, Magritte, Hayez, Picasso, Chagall, Toulouse Lautrec…

Giotto: el baso tra Gioacchino e Santa Ana

Forsi qualchedun de voi se domandarà come mai go volù scriver de Padova in questa rubrica dedicada al nostro dialeto istroveneto. Ormai xe più de duecento anni che i punti de riferimento per i studenti istriani i xe cambiadi: soto l’Austria la “capitale” de gran parte dei Istriani no xe più Venezia, ma Trieste. Però a Trieste no esisteva un’Università (la nassi solo nel 1924), Padova mantien el suo ruolo ma la vien afiancada da Graz, Vienna, adiritura Praga. Poi, soto la Jugoslavia, i Istriani i comincia andar a studiar a Fiume, Zagabria, Lubiana, Belgrado, Zara, pochi xe quei che i va studiar in Italia.

Ma ieri, guardando i stemi dei tanti studenti istriani al Palazzo del Bo’, xe sta renderse conto che gran parte del “sapere” (medicina, legi, istruzion, urbanità) presenti in Istria per secoli el ne xe rivà proprio da Padova.