XE CHI CHE BASTONA E XE CHI CHE LE BECA: Speso la grande storia la masina le vite e i destini dela povera gente

Ogi xe el 6 genaio, ma no scriveremo né de i Re Magi, né dela Befana, ma de un fato storico che xe capità tre giorni prima e dei sui risvolti de qualche ano fa: la tragedia al mulin de Pola del 3 genaio 1947.

Se ve domandè perchè speso me piasi de scriver de storia, ecove la risposta: la storia, confrontada col presente, la xe come un gigante confrontado con un nano. Ma el nano, se 'l se rampiga sule spale del gigante, el vedi più lontan.

I morti del 3 genaio 1947 i xe una direta conseguenza dela confusion che a volte combina la politica. Da una parte stava i paroni del mulin, i Sansa de Dignan, che gavendo deciso de andar in Italia co se ga savù che Pola la saria pasada ala Jugoslavia, i voleva portarse via anche le machine del mulin semplicemente perché le iera sue.

Da l’altra parte stava un grande numero de antifascisti de Pola che, stufi dele capele combinade da l’Italia fascista, impauridi de restar - in una Pola che se la ʃvodava e meʃa in macerie dopo i bombardamenti, sensa machine per lavorar - ma anche pompà dala ideologia comunista che predicava “le fabriche ai operai”, el 3 genaio del 1947 i xe andai in masa là del mulin per blocar la rimosion dele machine.

Secondo mi saria sai sbaglià giudicar con i metri de ogi quel che xe capità quela volta. Xe meo tornar al contesto storico del periodo. In quei ani a Pola iera fame e miseria, el mulin iera uno dei pochi impianti in grado de produr qualcosa de magnar. E el pan xe sacro, non per niente el xe uno dei simboli de Cristo che a sua volta el xe el simbolo dela giustisia e dela compasion. Eco perchè xe de capir i operai polesani de l'epoca.

Presto xe nato caligo, la polisia dei anglo-americani, i bacoli neri, la se ga meso bastonar i antifascisti e, per disgrasia, anche a sparar. Tre giovani antifascisti polesani, Lino Mariani, Antonio Salgari e Mario Lussi i xe restai copai sul posto e mio papà, anche lui tra quei che protestava (al’epoca el gaveva venti ani), el ga becà dai bacoli neri un per de manganelade sula schena e sule gambe. Sula gamba sinistra che xe restà el segno per tuta la vita, qualche volta el me lo mostrava con le parole “ara che bel sete che me ga disegnà i bacoli neri là del mulin”.

Più de sesanta ani dopo, nel giugno del 2007, iero a a Cherso per presentar un libro. Dopo la serata leteraria son restà a ciacolar con la gente, iera una bela compagnia, fatostà che go perso l’ultimo tragheto per tornar in teraferma.

Poco mal, l’estate la iera xa cominciada, el primo tragheto del giorno dopo el partiva xa ale 4 de matina e savevo che a Valon de Cherso i locai i iera verti fin le due de note. Poi, le altre due ore le saria pasade presto, magari dormedo in auto a l’imbarco del tragheto.

Cusì son andà a Valon, me go comodà in un local in riva e, anche se iera sai tardi, al tavolo vicin de mi iera sentade  due signore ansiane, se no le gaveva otanta ani sai poco ghe mancava, che le parlava in dialeto istroveneto, pareva de star in Istria. Mai in vita mia gavevo ciamà el camerier, gnanche per farghe le bele ale mule giovani, per dirghe “el ghe porti qualcosa de bever a nome mio a quel tavolo”, ma quela sera a Valon lo go fato.

Cussì le signore le me ga invità a sentarme con lore, gavemo ciacolà de tante robe, de l’ogi, del doman e anche del ieri. Ad un certo punto una dele due signore la me dixi: “lei che el xe de Pola sicuro el conosi i fati del mulin. Pena finida la seconda guera mondial, qua a Cherso iera sai miseria, mio fradel povereto, che Dio ghe ‘brasi l’anima, no ‘l gaveva lavor, cusì el ga acetà de meterse la divisa dei bacoli neri, el xe andà a Pola e anche lui ghe ga tocà onʃer col manganel la gente che protestava. Per sta roba el ga soferto tuta la vita”.

La note la iera bela, sai stele in ciel, se sentiva qualche grilo, le barche le se riposava sul mar calmo del golfeto de Valon prima de acoglier, el giorno dopo, gente con tanta voia de divertirse al bagno.

Ala signora che me ga contà la storia de suo fradel no ghe go dito del "sete" sula gamba de mio papà, go solo comentà che speso la grande storia la fa bruti schersi, la masina le vite e i destini dela gente povera e picia e che far el giudice dela storia xe uno dei mestieri più dificili del mondo. Poi se gavemo fato un’altra bibita, ma no l’aranciata de prima, bensì un otavo de vin bianco.