„Va studiar o per mantegnirte te speterà quel che me ga tocà s mi, spacarse la schena ogni giorno“. Questa iera una racomandassion che i genitori i ghe fasseva ai fioi fin a no tropo tempo fa, e la gaveva un senso. Per restar in tel Istria del XX secolo, se pensemo ben, le generassioni dei „studiadi“ nate nella seconda metà del secolo, co se parla de lavor, la se la ga passà sai meo dei quei che xe vegnui prima de lori. Prima dela seconda guera mondial, i posti de lavoro per impiegati nele aministrassioni iera pochi, no iera tante grande aziende che gher serviva economisti, esperti de marketing, legali, con poche scole iera anche pochi maestri e professori. E, anche se i iera sai stimai, no iera tanti dotori, avocati e notai, ma gnanche botegheri, osti e paroni de pici alberghi. Tanti viveva de lavori precari, ogni matina i se meteva in riga per spetar qyalche lavor magari solo de poche ore, el più dele volte i se ritrovava con un mazza in man sentai su una piera a far batuda, spacandoghe con sai fatiga l'anima ai sassi. Quasi nissun, se no a Brioni, viveva de turismo.
Iera invesse tanti i militari, anche de più iera i contadini che i passava tuto el giorno con la schena curva in tei campi con la zapa, la pala o la sfalsa in man, e i operai che, oltre a gaver un bianco e un nero de paga, i gaveva sai pochi diriti.
Dopo el 1945 diversi Istriani i ga comincià andar studiar, se ga verto tanti posti de lavoro che per becarli ghe voleva esser laureadi, o almeno no ‘coreva meterse indosso el terliss. E, anche se ghe vol ameter che le condissioni de lavoro dei operai le iera diventade sai meo, in tela seconda metà del secolo passà, anche se stavimo in un sistema fondado sul riscatto della classa operaia, sul “proletari di tutto il mondo unitevi” e sul superamento del marxian “lavoro alienato”, come considerasion sociale e come guadagni i operai i vegniva sai dopo dei impiegati, ragionieri, maestri e dei tuti i altri mestieri con la laurea.
Desso, co anche in Croazia gavemo igrumà no la pappa reale, ma tuti i dani colaterali del capitalismo, la bussola dela stima la ga cambiado diression, spostandose dal “esser e saver” al “gaver e poder”. I primi che a pagar el conto xe sta i maestri e i professori che, anche se i fa el nobilissimo mestier de darghe un istrussion (condission fondamentale per la dona e l’omo de ogi e che “tali vogliono dirsi”) ai nostri fioi, i vien dispressai, atacai, acusai. I più rispetai, invesse, xe i pessecani del business, quei boni de far soldi, i tajkuni che i se impinissi i tacuini.
Un’altra novità xe che la racomandassion „va studiar o per mantegnirte te quel che me ga tocà s mi, spacarse la schena ogni giorno“ ogi la risc'ia de esser sbagliada. In tel Istria de ogi, tuta girada verso el turismo e indò che tuti quei che i pol i fa de tuto per meter a posto camere e apartamenti de 'fitarghe ai turisti, xa da venti anni xe el momento dei manovai: muradori, pitori, piastrelisti, tubisti, eletricisti, „maestri“ de condissionatori de aria. Insoma, davanti ai oci gavemo el riscato dei operai che ogi no solo i guadagna sai ben, ma i xe rispetai e bisogna meterse in fila per farseli vegnir in casa a lavorar, tanta xe la richiesta. Anche prima esisteva sti „majstori“ che i lavorava de foravia, ma no i iera superstar come questi de ogidì.
Se da una parte ne pol far sai piasser che i operai i ga finalmente una dignità e più schei in scarsela, da l’altra xe sorprendente scoprir che andar a studiar, esclusi quei che i riva diventar eccellenze e i guadagna milioni, xe una scelta che convien sai poco. O almeno la convien poco se se pensa ala paga che se porterà a casa, perché per el resto studiar “convien” sempre, se scoprir almeno una miliardesima parte dele meraviglie de sto nostro pianeta e de tute le abilità, arti e pensieri dele persone che ghe sta sora, la vien considerada un arichimento dela persona.
