XE EL DIECI FEBRAIO, GIORNO DEL RICORDO: Tra storia e memoria ogi scegliemo la seconda, dedicandoghe un pensier a tuti quei che i xe andai morir lontan de casa sua

Ogi xe el 10 febraio e xe venti ani che l'Italia la ga scelto questa data per stabilir el „Giorno del ricordo“ per, come che dixi la motivassion dela lege, conservar e rinovar le memoria dela tragedia dei Taliani e de tute le vitime dele foibe, de l'esodo dale sue tere de origine dei Istriani, Fiumani e Dalmati nel secondo dopoguera e dela più complicada vicenda del confin orientale de l’Italia.

Tanto per dar un poco de contesto, el 10 febraio xe la data in cui a Parigi xe sta firmado el Tratato de pase con el qual l’Istria, Fiume e Zara da l’Italia, vinta in guera, i passava ala Jugoslavia.

Di fronte a questa data e a queste celebrasioni vien in mente la diferensa che esisti tra storia e memoria. E la storia spesso no la ghe fa onor ala memoria. La storia, ma anche el bon senso e la giustisia,  la imponi de valutar anche i dolori e la ragioni dei altri, per la memoria basta un fià de umana compassion e ogi saria bel dedicarse proprio ala memoria.

Parlar de storia – e la storia de l’Istria la xe anche più che complicada – volessi afrontar tante robe che saria sbaglià nominar in un giorno dedicado al ricordo.

Ghe volessi parlar del contesto più generale, de quel che i Fascisti i ghe gaveva combinà ai Croati e Sloveni de l’Istria tra el 1918 e ‘l 1943, ghe volessi scriver in un lungo in largo dei tanti pregiudizi su l’Istria che i invelena tanto i Taliani, quanto i Croati e i Sloveni che i conta la “sua” version de la storia de l’Istria.

Quai pregiudizi? Quei su un’Istria italianissima e un’Istria croatissima (no esisti ne l’una ne altra), el fato che tanti i se guanta al’idea sbagliada che no esisti stato sensa nasion e alora i credi che i Taliani i sia vegnudi in Istria solo nel 1922, tuti con la camisa nera, opur quei pregiudizi che i ga partorì le disgrasiadissime idee de quei che credi che tuti i esuli i iera fascisti e tuti i Taliani restai a casa comunisti.

Poi, in Italia xe presente quela grande miopia storica che la dixi che i partigiani e la sinistra italiani i devi difender a tuti i costi el comunismo jugoslavo anche col se ga trasformà in nazionalismo, opur la convinsion che l'lstria sia un argomento de destra e questo perché tante volte i esuli i gaveva votà, in una specie de sindrome de Stoccolma, per el partito MSI che el iera erede de quel fascismo che li gaveva fati diventar esuli.

Una dele miopie più brute, cative e sbagliade, xe quela dei quei che Taliani che, coscienti dela grande presenza de Croati e Sloveni in Istria, i predicava che no serviva rispetarli e che ghe voleva snazionlizarli, cancelarli.

Questi nominai fin deso xe solo apunti de storia, xe temi che se dovesi svilupar in pagine e pagine, come che se podesi anche criticar el fato che el “Giorno del ricordo” el esalta tropo le foibe, sai de meno l’esodo (che xe sta el vero drama de l’Istria, con la sua costa ovest che la cambiava lingua dopo domila ani) e per niente el destin de quei Taliani che i xe restai a viver in Jugoslavia. Ma gavessi poco senso, in un momento in cui se parla de tersa guera mondial, scoprir che la seconda no la xe ancora finida.

Per no dir che ingroparse con la storia faria spuntar anche la domanda se iera peso nasser Croati o Sloveni soto l'Italia fascista o Italiani nela Jugoslavia de l'unità e fratelanza, che saria come domandar se xe meo morir impicà in do e do quatro o pian pianin de fame.

Eco perché ogi, invese che ala storia, saria più giusto dedicarse ala memoria, al rispeto de quela gente che la ga lasado casa sua portandose via anche i morti, lasando quasi svode cità istriane in cui el rumor più forte el iera quel dei ciodi che i serava le casse con le povere robe che i esuli i se portava via e che speso no le xe gnanche rivade a destinasion fermandose al Magasin 18 de Trieste.

Una volta go leto in un libro scrito da un esule (me dispiasi, no me ricordo più né ‘l titolo, né l’autor) che una famiglia de esuli, dopo eser stada in campo profughi per sete lunghi ani, la gaveva finalmente becà la casa popolare. Xe sta tremendo leger che in quel momento la sorela la ghe gaveva dito al fradel: “guarda, gavemo le finestre”. E poi, per quel che riguarda i Taliani restadi in Jugoslavia, me vien in mente la frase de un raconto de Nelida Milani Kruljac: ala moglie che la ghe brontolava perché no i iera andai esuli anche lori, el marì che gaveva risposto “perché qua gavemo la casa”, al che la dona la ghe gaveva replicà: “bon, deso magna muro”.

A causa dei confini, xe milioni le persone che in giro per el modo le ga patì, spesso morendo de crepacuor. Solo per nominar i ultimi 100 ani in Istria, ghe volesi gaver un giorno del ricordo per i Austriaci che nel 1918 i ga dovù abandonar l’Istria diventada italiana, un altro per i Croati e Sloveni andadi profughi nel vecio Regno de Jugoslavia, partidi poco dopo a causa dei maltratamenti subidi dai fascisti, un terso per i Serbi scampai dopo el 1991 perché no i se fidava del novo stato croato dopo che per 45 ani i ghe gaveva dito che questa iera casa sua.

Ghe volessi, si. Ma ogi xe el dieci febraio e quei che i credi in Dio saria bel se i faria una preghiera per le anime digrasiade de quei Taliani che, sensa eser fascisti o criminai de guera, ma speso antifascisti o anche Croati, i xe andai morir lontan de casa sua.